Commu ferru pizzutu,
iaddi mavvagnoti
scàunu ciccannu ‘u matinu,
mentri dâ muntagna nfucata
scenni Donna Lucia Pantano.
‘A so’ canni giarnizza e rramata
sapi di menta e rrina.
‘I so’ minni, ancora cippu scuru,
bramìunu latti mai datu.
“Lucia, a ccu stai ciccannu
senza cumpagnia a ‘sta ura?”
“Ceccu a cu vogghiu. Senti:
a-ttia, figghiu, chi t’impotta?
Chiddu chi ceccu u sai:
a gioia di Mavvagna e dâ so’ genti”
“Lucia di centu dottrini,
non vidi chi ‘stu paisi pinìa
e mmòri senza ‘na raggiuni?”
“Ah, nun mi muntuàri ‘u paisi
chi mi bbrisci ‘na pena nìura
commu ‘i so’ chiusi bbannunati”
“Lucia, chi pena intra i tia,
chi lazzariata pena!
Cianci sucu di limuni sprimutu
iàcru di cannuriamenti amari”
“Si, chi pena lanni! Fuju
casa-casa commu ‘na paccia
strascinànnumi ‘i ma trizzi
dâ cucina ê peri ô lettu.
Appena ci penzu, diventu russigna
ndê ma canni e ndê ma robbi.
Ah, unni sìti, junnatari stanchi
câ vostra peddi bruciata dû suri?
Ah, unni sìti, campagni laùrati
a frummentu e sciàurusa malva?”
“Dunna Lucia Pantano,
nun ci pinzari chi nun vari ‘a pena
e lassa stari ‘u to’ pettu ndâ paci,
picchì Mavvagna nun mori mai…
ammènu ndô funnu dû nostru cori!”
Dialetto di Malvagna (ME) – Tratto da: Fogghi Mavvagnoti © Josè Russotti
Donna Lucia Pantano
Come ferro appuntito, / galli malvagnesi / scavano frugando il mattino, / mentre dalla montagna infuocata / scende Donna Lucia Pantano. / La sua carne giallastra e avvizzita / profuma di menta e sabbia. / Il suo seno, ancora ceppo scuro, / brama latte mai versato. / “Lucia, chi vai cercando / senza compagnia a quest’ora?” / “Cerco chi voglio, dimmi: / a te, figliolo, che importa? / Quello che cerco lo sai: la gioia di Malvagna e della sua gente” / “Lucia di cento catechismi, / non vedi che questo paese soffre / e muore senza alcuna ragione?” / “Ah, non nominare il paese / che mi assale una pena scura / come le sue contrade abbandonate” / “Lucia che strazio è in te, che lancinante pena! / piangi succo di limone spremuto / acre di attese amare” / “Sì, che pena immensa! Corro / per casa come una matta / trascinandomi le mie trecce / dalla cucina ai piedi del letto. / Quando ci penso, divento rossa / nelle mie carni e nelle mie vesti. / Ah, dove siete, contadini stanchi / con la vostra pelle bruciata dal sole? / Ah, dove siete, campagne coltivate / a frumento ed odorosa malva?” / “Donna Lucia Pantano, / non ci penare che non serve a nulla, / e lascia stare il tuo petto in pace, / perché Malvagna non muore mai… / almeno, nel profondo dei nostri cuori”.
